Global Shark Week gisaulog

CEBU, Philippines- Gisaulog karon ang Global Shark Week nga gisugdan niadto pa’ng Domingo ug molungtad hangtud sa Agosto 16.

Ang kalihukan gitumong aron kapanalipdan ang kadagatan ug ang mga iho nga gihimo na’ng sagol sa pagkaon.

Ang grupong Philippines Ocean Campaigners ug Green Peace Southeast Asia nanawagan sa katawhan sa pagpanalipod sa kadagatan ilabi na sa mga iho.

Si Vince Cinches sa Philippines Ocean Campaigners mibutyag nga importante gyud kaayo nga panalipdan ang mga iho tungod kay daku kini og matabang sa seguridad sa pagkaon, pagpalambo sa turismo ug sila usab ang hinungdan nga ma-balanse ang eco-system.

Gawas sa paghimo og mural painting, usa ka summit ang ilang ipahigayon aron makamugna og konkreto nga solusyon aron kapanalipdan ang kadagatan.

Matud ni Cinches nga daghan  mga iho karon ang nangawala ug kini maoy ilang gipaningkamutan nga malikayan.

Dili lang ang grupo ang mihimo sa maong lakang kun dili lakip na sa mga ahensiya sa kagamhanan. - /GMR) (BANAT NEWS)