CEBU, Philippines- Usa ka 66-anyos nga retiradong polis ang gisikop sa Criminal Investigation and Detection Group (CIDG)-7 human nakuhaan og daghang mga armas, bala, ug granada sa Sitio Kalubian, Talamban, Cebu City niadtong nakalabay nga adlaw.
Ang dinakpan naila nga si Benjamin Bontilao Arconada, nagpuyo sa maong lugar. Matud pa ni Superintendent Fermin Armendarez III ang deputy chief sa CIDG 7 mibutyag nga dunay mga tawong nangreklamo batok ni Arconada kay magdala-dala kini og armas sa ilang lugar.
Sumala pa ni Armendarez nga si Arconada kataposang nadestino sa Talamban Police Station ug dunay ranggo nga “Senior Inspector” sa dihang miretiro sa serbisyo. Gisusi pa sa kapolisan ang record niini.
Ang CIDG-7 armado og search warrant nga giisyu ni Judge Soliver Peras sa Regional Trial Court (RTC 7) Branch 10 sa dakbayan sa Sugbo dihang ilang gironda ang balay niini.
Nakuha sa iyang balay ang usa ka Baby Armalite Rifle nga dunay serial number, usa ka .9mm pistol nga dunay serial number, duha ka magazine sa maong pistola nga puno sa bala, usa ka Black Widow caliber .22 magnum nga dunay serial number, duha ka granada, duha ka rifle (propelled) grenade, 17 ka 40 millimeter explosive rounds, 88 ka bala sa shotgun, 192 ka bala sa .9mm, 114 ka bala sa .38 revolver, 15 ka bala sa .30 caliber, 12 ka magazine sa 5.56mm nga dunay 20 ka bala, 45 ka bala sa 5.56mm, duha ka accessories sa M16 ug uban pa nga gamit. Matud pa ni Armendarez nga way napakitang dokumento sa maong mga armas ug eksplosibo si Arconada hinungdan nga ila kini gisikop. Nakompirmar usab sa CIDG gikan sa Firearms and Explosives, Security Agency Supervisory Section (FESAGSS)-7 nga wala kini lisensyadong armas sa ilang buhatan.
Gisuwayan og kuha og pamahayag ang dinakpan apan nagdumili na kini sa pagtingog. “Di na lang ko mo-estorya para walay sayop, magsinabtanay lang ta,” matud pa ni Arconada.
Kasong illegal possession of firearms and explosives ang atubangon ni Arconada nga walay piyansa nga girekomendar. - /EIM) (BANAT NEWS)