Walo giharos sa awto

CEBU, Philippines - Naangol ang walo ka tawo nga sakay sa tulo ka motorsiklo dihang kalit lang nga giharos og usa ka sakyanan sa dalan H. Abellana, Canduman, dakbayan sa Mandaue alas 3 pasado sa hapon niadtong Biyernes.

Ang mga naangol mao sila si Paulino Aniasco, 52, taga Talamban, dakbayan sa Sugbo, kinsa maoy nagdala sa Honda nga motorsiklo diin sakay ang tulo nga sila si Roy Booc, Rosita Baclaan ug Carolina Dihayco nga taga Cubacub, dakbayan sa Mandaue.

Dugang naangol mao si Ferry Hinaut, taga sitio Soong, Mactan, dakbayan sa Lapu-Lapu nga sakay sa iyang Yamaha nga motorsiklo.

Laing naangol mao sila si Geberoso Tudtud Jr., taga Canduman nga nagdala usab sa Yamaha nga motorsiklo ug iyang sakay nga si Fritz Tudtud, 10-anyos, taga Cubacub kinsa nakabaton og kadaut sa iyang kalawasan.

Ang multicab nga may plate number GTU 860 nga gimaneho ni Edgar Sanchez, hingkod nga taga Canduman ang lakip sa napagan ug naka-angkon og kadaut.

Si SPO4 Apolinario Niez, imbestigador sa traffic division sa Mandaue City Police Office (MCPO), miingon nga ang drayber sa Honda nga sakyanan nga nagdala sa plate number KAY 401 nga si Leo Esperas, ang nadakpan sa ginukdanay sa kapolisan dihang nisuway kini sa pagpabulhot human sa insidente.

Ang mga sakop sa Emergency Rescue Unit Foundation (ERUF) dali nga midala sa mga biktima sa North General Hospital ug pipila kanila ang gidala sa Mandaue City Hospital.  (BANAT NEWS)