P1M danyos sa sunog

CEBU, Philippines - Mokabat sa P1 milyon ang gibanabanang danyos sa sunog sa usa ka bodega ug upat ka apartment ug auto repair shop nga nahimutang sa tapad niini diha sa eskina Superior ug dalan Catalino U. Ouano sa Barangay Looc, Dakbayan sa Mandaue  sa miaging adlaw.

Kini ang nasayran sa Banat News kang SFO2 Jade  Nacua, imbestigador sa Bureau of Fire Protection (BFP) sa maong dakbayan sa follow up nga gihimo kagahapon.

Matud pa niya nga ang mga kemikal, plastik ug mga goma nga napundo sa sulod sa bodega  sa BG Dionisio Marketing nga gipanag-iya sa magpapatigayon nga si Dionisio Chua maoy nag-unang hinungdan nga nadugay ang ilang pagpawong sa kalayo.

Dugang pa niya nga naglisod g’yud sila sa pagpawong sa kalayo nga maoy hinungdan nga tibuok gabii ug hangtod na sa buntag sa adlaw nga Sabado ang ilang pagpasirit og tubig.

Si Roger Paller, Public Information Officer (PIO) sa kagamhanan sa Dakbayan sa Mandaue nga nahinabi sa Banat News miingon nga ang buhatan sa City Social Welfare Services (DSWS) nagpadayon sa ilang pagpanglista sa mga naapektohang pamilya sa maong sunog. Dugang pa niya nga ang kagamhanan sa maong dakbayan  nagpadala na og mga tolda nga magsilbi nilang temporaryong kapuy-an ug ang DSWS sa dakbayan nga gipangulohan ni  Violita  Cavada padayon na usab nga nagpadala og ready eat nga matang sa mga pagkaon alang sa naapektohang pamilya.  (BANAT NEWS)