Agrivet, sikyu gitulis

CEBU, Philippines -  Gitulis sa nagbinugtong tulisan ang usa ka agrivet sa Poblacion, lungsod sa Compostela alas 7 sa buntag niadtong Huwebes.

Ang gitulis mao ang URC Agrivet Supply kansang cashier ug tindera mao si Analuna Pilago, 22-anyos, taga Looc, dakbayan sa Danao.

Matud ni PO2 Emil Ruvilla sa Compostela Police Station nga nag-inusara lang ang biktima nga nagbantay sa tindahan dihang kalit lang mitumaw ang nagbinugtong nga tulisan nga nagpakaaron-ingnon nga kustomer.

Nakamatikod ang suspetsado nga abli ang pultahan sa tindahan maoy hinungdan nga kalit kining misulod ug gitionan og armas ang tindera ug mideklarar nga tulis.

Nakuha sa tulisan ang P3,500 ug kalma lang nilakaw gawas sa tindahan.

Base sa picture gallery sa mga tulisan sa lungsod, giila sa biktima ang suspetsado nga usa ka alyas Bodie dela Victoria nga taga Canamucan sa maong lungsod.

Ang suspetsado giila nga mao usab ang nagtulis sa usa ka lending collector sa miaging buwan.

Samtang laing biktima sa pagpanulis mao si Ariel Arclita, 24-anyos, guwardiya sa Asian Star Express Cargo Forwarder sa North Reclamation Area sa dakbayan sa Mandaue alas 6 pasado kagahapon sa buntag.

Si SPO1 Michael Limalima sa Presinto 2 sa Mandaue City Police Office (MCPO) miingon nga gikan pa sa iyang duty ang biktima ug naglakaw pauli sa maong dapit dihang kalit lang gitionan og armas sa nagbinugtong tulisan.

Nakuha sa tulisan ang iyang bag nga gisudlan sa uniporme, cellphone, lisensiya ug salapi nga P150 nga iyang pamelete .(/GMR)(BANAT NEWS)