CEBU, Philippines - Sukad tuig 2009 nga pagtago-tago, nasikop sa Criminal Investigation and Detection Group-7 sa Pakigne, Minglanilla ang 72-anyos nga lalaki nga giilang usa sa most wanted sa Mindanao.
Si Wilfredo Jumawan, taga Calamba, Misamis Occidental gitumbok nga nakapatay sa usa ka kanhi sakop sa Philippine Constabulary (PC).
Nasikop si Jumawan sa pinuy-anan sa iyang anak nga maestra pinasikad sa warrant of arrest nga giisyu ni Judge Bernadette Paredes Encenareal sa Regional Trial Court (RTC) Branch 36 sa Misamis Occidental.
Matud ni Insp. Delfin Bontuyan sa CIDG-7 nga ilang nasubay ang gitago-an ni Jumawan human gisusi ang gipuy-an sa iyang mga paryente ug anak sa Sugbo.
Ang grupo sa CIDG-7 nga gipangulohan sa ilang deputy chief, Supt. Fermin Armendarez, ang daling mihimo og operasyon sa maong lugar ug nasikop ang akusado.
Sumala pa ni Bontuyan nga hubog si Jumawan atol sa ilang pagsikop.
Sa wala pa nasikop ang suspetsado, gitug-an ni Bontuyan nga duna usab sila’y nakuha nga impormasyon nga magtabok-tabok lang ang suspek sa lungsod sa Tuburan ug Minglanilla sa pagtago-tago.
Si Jumawan nalista isip top 22 wanted person sa Misamis Occidental diin gisubay pa sa CIDG-7 kung duna ba’y patong sa ulo. Ang akusado nga gisuwayan og kuha og pamahayag sa mga tigbalita igo lang mikatawa.
Gihikay na sa mga operatiba ang pagbalhin ni Jumawan paingon sa Mindanao aron sa pag-atubang sa iyang kaso. (/GMR)(BANAT NEWS)