CEBU, Philippines - Gireklamo sa usa ka 13- anyos nga batang babaye ang barangay konsehal sa usa ka barangay sa dakbayan sa Mandaue nga milugos kaniya sulod sa motel sa reclamation area sa maong dakbayan.
Ang reklamo sa maong bata iyang gipatala sa blotter sa Presinto 2 sa Mandaue City Police Office (MCPO) ug giasoy niya nga nahitabo ang pagpanglugos alas- 12 pasado ang takna sa udto niadtong Agosto 2 niining tuiga.
Ang biktima misugilon sa Women’s Section nga gikaila niini ang konsehal sa usa ka mall sa reclamation area ug giingong gihaylo siya pagpasakay niini sa iyang sakyanan. Apan gidala siya niini sa usa ka motel diin siya gilugos.
Si PO1 Mary Rose Megio sa Women’s Section mitambag sa bata pagpaubos sa medical examination ug ang resulta gamiton pagpalig-on sa kaso nga ilang ipasaka.(/EIM)(BANAT NEWS)