CEBU, Philippines - Patay ang 36-anyos nga babaye nga miambak sa tungatungang bahin sa Marcelo Fernan Bridge habig sa Barangay Umapad, Dakbayan sa Mandaue alas 2:05 ang takna kagahapon sa hapon.
Si PO2 Martin Auman sa Presinto 5 sa Mandaue City Police Office (MCPO) miila sa namatay nga mao si Angelina Dimpas, taga Zone Siboyas, Barangay Paknaan sa maong dakbayan.
Matud pa ni Auman usa ka ice cream vendor nga diha sa Mandaue Park nga nahimutang sa ilawom sa nahisgutang taytayan ang nakakita sa paglayat hangtod nga mihagsa sa dagat ang babaye.
Midugang si Auman nga ang iyaan ni Dimpas nga si Leah mitug-an nga duna na kini kakulian sa pangisip ug sa higayon nga mosugmat kalit lang kining mawagtang sa ilang balay ug ilang maapasan nga maghinuktok sa ilawom sa maong taytayan.
Ang mga sakop sa Emergency Rescue Unit Foundation (ERUF) dali nga nakatubag sa maong alarma ug midala kang Dimpas sa Mandaue City Hospital apan gideklarar kini nga dead on arrival.
Samtang usa ka Eric Ceniza, 39, taga dalan Zamora, Barangay Centro sa mao gihapong dakbayan ang nakit-ang nagbitay sa pisi nga gihikot sa ibabaw nga bahin sa iyang balay sa miaging Miyerkules sa gabii.
Si PO2 Jesson Flores sa kapolisan sa Presinto 1 sa Mandaue City Police Office (MCPO) mibutyag nga nadiskubrehan kini sa mga kabanay ug gidala sa Mandaue City Hospital apan patay na kini.
Matud ni Flores ang mga kabanay ni Ceniza mitug-an nga naguol kini human gibiyaan sa kapuyo. (BANAT NEWS)