Usa sa mitulis sa pawnshop sa Balamban nadakpan

CEBU, Philippines - Human sa pipila ka adlaw nga surveillance sa Provincial Intelligence Branch (PIB) nadakpan na ang usa sa lima ka mga suspek sa pagpanulis sa usa ka pawnshop sa lungsod sa Balamban sa miaging adlaw diha sa Poblacion, Tuburan.Ang nadakpan naila nga si Lauro Vergara, 30, usa ka habal habal driver ug nagpuyo ra ‘sab sa maong lungsod. Sumala pa nga nasigpatan kini sa plaza atol sa pagtulis sa lima ka mga lalaki ug nasakiyo ang P300 mil mga alahas ug cash.

Matud pa ni Superintendent Rodulfo Albutra ang hepe sa PIB sa Cebu Provincial Police Office (CPPO) nga usa ka Allan Milan nga chief tanod sa Poblacion nga unang nakaresponde miila sa igsuon ni Vergara nga si Joel mao ang tawong misuway pagpusil kaniya apan swerteng wa mobuto ang armas niini.

Narekober sa kapulisan sa posisyon sa dinakpan ang usa ka KG9 sub-machine gun, .38 revolver ug pipila ka pakete sa drugas. Apan si Joel ug laing tulo pa nila ka kauban wala pa madakpi. Ang grupo ni Vergara mao sa’y gitudlo karon sa kapulisan nga mao’y utok sa mga pagpanulis sa mga delivery vans sa lungsod sa Tuburan, Balamban ug siyudad sa Toledo.

Apan hugtanong gihimakak ni Vergara ang maong pasangil kay matud pa nga naa  siya sa ilang balay sa dihang nahitabo ang tulis sa Balamban niadtong adlaw nga Domingo. Wa usab niya angkona nga iya ang maong mga armas. (BANAT NEWS)