Polis giilogan sa armas, gisukmag sa hubog
CEBU, Philippines- Gidakop sa kapolisan ang usa ka lalaki nga hubog kinsa nangilog og armas sa polis ug nakasukmag pa gyud sa laing polis.
Ang gidakop mao si Ricky Aroa, 24-anyos, ulitawo nga taga Sliding Hills Subdivision, barangay Labogon, dakbayan sa Mandaue.
Si PO2 Junnie Lepiten ug PO1 Jerry Pabadora maoy nakatubag sa alarma labot sa gikatahong pag-wild sa suspetsado nga giingong nagmaoy sa labihang kahubog.
Dihang giduol ni Lepiten aron pagpakalma, kalit lang gilabni ang iyang armas ug si Pabadora ang dali usab nga mipakgang apan naigo sa kumo dihang gikalitan sa pagsukmag ni Aroa.
Si Lepiten miingon nga positibo ang resulta sa gipahigayung liquor test hinungdan nga kasong direct assault ug kalapasan sa City Ordinance 434 o anti-drunkenness ang ipasaka sa mga polis batok ni Aroa kinsa temporaryong gibalhog sa detention cell sa kapolisan. -/GMR) (BANAT NEWS)
- Latest
