Duha ka Acacia tree giputol na, tiwason karon

CEBU, Philippines- Gisugdan na pagputol kagahapon ang pito ka kahoy nga gideklarar nga dunot ug peligro na sa kadalanan sa Naga City.

Duha sa pito ka century-old acacia nga kahoy ang giputol kagahapon gikan sa alas-9 sa buntag ngadto na sa 3:30 sa hapon sa hiniusang pwersa sa Naga City Government, Department of Public Works and Highways, probinsya sa Sugbo, Department of Environment and Natural Resources, kapolisan sa Naga ingon man mga barangay tanod ug mga opisyales.

Ang pagpamutol niini miresulta sa kahuot sa dagan sa trapiko habig sa barangay Inoburan ug Tinaan dihang partial nga gisiradohan ang dalan.

Dunay mga mikanaug sa gisakyang bus ug jeep nga nagdali sa ilang biyahe ang nanglakaw ug nanakay sa unahan.

Ang environmentalist ug running priest Father Robert Reyes  mikatkat sa usa sa mga putlunong Acacia ug gisab-itan og tarpaulin nga nag-awhag sa mga Sugboanon nga luwason ang mga kahoy.

Matud ni DENR spokesperson Eddie Llamedo, ilang girespeto ang kagawasan sa pagpadayag apan mitataw sa ila usab nga mandatu sa pagprotektar sa kinatibuk-ang kaayuhan. - /EIM) (BANAT NEWS)