CEBU, Philippines- Patay ang usa ka babaye human maigo sa naghaguros nga delivery truck dihang milabang sa karsada sa sitio Cabangcalan, barangay Dakit, dakbayan sa Bogo kagahapon sa buntag.
Si Pevida Fernan, 43, taga barangay Libertad sa maong dakbayan, nakaangkon ug grabeng samad sa lawas ug daling gidala sa Bogo Provincial Hospital apan gideklarar kini nga dead on arrival.
Nagtingkagol sa karsel sa Bogo City Police Station si Romeo Gaviola, 38, taga barangay Pooc, dakbayan sa Talisay, nga maoy nagmaneho sa deli-very truck nga padulong sa lungsod sa San Remigio.
Ang truck gipanag-iya sa Afugao Corporation ug paingon untang mag-deliver og gelatin goods sa dihang wala mabantayi si Fernan nga milabang sa dalan gikan mikanaug sa traysikol nga gisakyan.
Ang kapolisan nagpaabot karon sa pamilya sa biktima nga mopatim-aw sa ilang buhatan alang sa pagpasaka og kaso o ba kaha sa pagpakig-areglo sa kaso. - /GMR) (BANAT NEWS)