Papa, anak gipamusil
CEBU, Philippines- Patay ang usa ka amahan nga drayber sa usa ka Public Utility Jeep (PUJ) nga dunay rota nga 17C samtang angol ‘sab ang iyang anak human sila gipamusil sa wala mailhing lalaki nga misakay kanila niadtong Sabado sa gabii diha sa Panganiban Street, Pahina Central ning dakbayan sa Sugbo.
Ang mga biktima naila nga sila si Edwin Godinez, 47, ug anak niyang si Jeff Rodel Godinez, 19, taga Sitio Kadauhan, Barangay Talamban ning dakbayan. Matud pa ni SPO4 Alex Dacua ang imbestigador sa Homicide Section sa Cebu City Police Office (CCPO) nga nahinabi sa Banat News kalit lang mipaduol sa tuo nga bahin sa driver seat ang gunman ug nangutana pa nga “Apas mo agi bai?”
Ug diha-diha gipusil ang drayber nga si Edwin hinungdan nga nawad-an kini og kontrol sa sakyanan ug nabangga sa kilid sa kalsada. Naigo sa nagkadaiyang parte sa kalawasan si Edwin hinungdan nga nakabsan kini sa iyang kinabuhi.
Ang anak human sa hitabo daling mipaduol sa likod sa amahan apan gisunod kini sa pagpusil sa kriminal diha sa bukton. Atol sa maong hitabo way laing pasahero gawas sa maong gunman. Ang duha daling gidala sa Cebu City Medical Center (CCMC) apan namatay gyud ang amahang Godinez.
Sumala pa ni Dacua nga posible nga ang target sa gunman mao ra ang amahan ug wala’y labot ang anak.
Nakuha sa kapulisan sa crime scene ang usa ka deformed slug sa wala pa matino nga kalibre sa armas. Gipaabot pa sa kapolisan nga makahatag og pamahayag ang anak nga padayon pa karon nga giatiman sa tambalanan. - /EIM) (BANAT NEWS)
- Latest
