CEBU, Philippines - Duha ka mga haligi sa panimalay ang naghikog , usa kanila giingong gibiyaan sa iyang asawa ug mga anak ang napalgang nagbitay na sa sulod sa iyang panimalay pasado alas 5 sa buntag sa Sitio Avocado, Barangay Inoburan, dakbayan sa Naga. Ang namatay giila nga si Charlito Tapao, 32, matud ni PO2 Michael Villarmia sa Naga Police Station nga nahinabi sa Banat News nga migamit kini og pisi sa iyang paghikog.
Dugang pa ni Villarmia, nga ang iyaan sa namatay maoy unang nakakita niini ug daling mipahibalo sa igsuon ni Tapao nga si Hermenia Mangolam.
Sumala pa nga ang iyang igsuon uwahi nilang nakit-ang buhi nianang gabii ug pwerteng huboga. Base sa inisyal nga report sa kapolisan nasuta kini nga naguol si Tapao tungod gibiyaan kini sa iyang asawa ug upat ka anak.
Samtang napalgan usab ang 59-anyos nga si Eleuterio Vasquez, nga nagbitay na sa punoan sa saging sa iyang anak diha sa Sitio Hantik, Barangay Babag, siyudad sa Sugbo.
Matud ni PO3 Leroy Baguio sa Homicide Section sa Cebu City Police Office (CCPO) nga ning tuiga lang nabantayan sa mga kabanay si Vasquez nga lahi na og taras.
Napalgan sa anak niini nga si Jerry ang amahan sa kasagingan nga nagbitay ug dunay hikot nga liston ang liog. (BANAT NEWS)