Labella supak nga mangutang ang siyudad aron ibayad sa SRP

CEBU, Philippines -  Supak si Acting Mayor Edgardo Labella nga mangutang ang dakbayan sa Sugbo arun maoy ibayad sa utang sa dakbayan dihang gihimo ang South Road Properties.

Matud ni Labella nga ang labing maayo sa pagkakaron mao ang pagbaligya  sa 26 ka ektaryang yuta sa SRP nga natanggong aron ang halin ibayad sa utang sa dakbayan.

Si Labella miingon nga kung mahalinan ang dakbayan, mabayran ang utang niini nga 3.2 billion ug duna pay buhis nga makuha sa yuta nga  mamahimong magamit alang sa social services.

Gikompirmar ni Atty. Joey Daluz III, usa sa financial advisers ni Cebu City Mayor Michael Rama nga  dunay tulo hangtud sa upat  ka mga dagkong negosyante nga gustong mopalit sa maong yuta apan nagdumili si Daluz paghatag sa pangalan sa maong mga negosyante aron maprotektahan ang ilang mga business interests.

Masaligon si Daluz nga dako ang makuha nga real property tax sa dakbayan kung mapalit na ang maong luna ug dunay matukod nga negosyo.

Gisugyot ni Daluz sa konseho nga mopahigayon na og public bidding aron pormal nga masugdan ang transaksyon sa pagpalit sa maong yuta. (/EIM)(BANAT NEWS)