Upat ka balay gilamoy sa sunog
CEBU, Philippines - Mokabat sa dili mominos 100 mil pesos ang danyos nga gibilin sa usa ka sunog nga miulbo sa Abellana Street, Barangay Suba, Cebu City, pasado alas-9 kagahapon sa buntag.
Matud pa ni Senior Fire Officer Three Roylin Maratas sa San Nicholas Fire Station nga nahinabi sa Banat News nga nagsugod ang sunog sa panimalay ni Alfredo Quezon sa ikaduhang andana sa iyang panimalay.
Alas 9:35 nadawat sa kabomberohan ang maong sunog, alas 9:58 gideklara nga under control ang maong sunog.
Miabot sa upat ka mga balay ang naugdaw ug tulo ang partially damage. Padayon pang gisubay kung unsa’y hinungdan sa maong sunog, apan usa sa gitan-aw sa mga bombero ang electrical misuse.
Duna sa’y usa ka batan-on ang nasamad ang bukton atol sa sunog nga naila nga si Kevin Mosqueda, 18, human nga misulay og salbar sa ilang mga gamit sa balay.
Ang sunog giisa sa 3rd alarm apan wala hinuoy nasugatang problema ang mga bombero tungod kay dako ang karsada.
Si acting mayor Edgardo Labella mimando na sa Department of Social Welfare Services nga pahatagan og pasiunang tabang sama sa ready meal ang mga nasunogan nga molanat og tulo ka adlaw. (/EIM)(BANAT NEWS)
- Latest
