Poultry farms posibleng suspensuhon

CEBU, Philippines -  Posibleng masuspenso ang mga permit sa mga poultry farms sa lungsod sa Asturias nga maoy gipasanginlang rason sa pag-atake sa mga langaw nga gidudahang hinungdan sa pagsakit sa mga molupyo sa pipila ka mga barangay.

Ang Provincial Health Office padayon pa sa ilang imbestigasyon ug pagtuon kabahin sa rason sa pagkasakit sa mga residente.

Si Gobernador Hilario Davide III naghuwat pa sa resulta sa imbestigasyon sa PHO ug matud niya mahimong suspensuhon ni Mayor Allan Adlawan ang permits sa maong mga poultry farm kun mapamatud-ang mao kini ang hinungdan sa pagdagsa sa mga langaw.

Dunay mga report nga ang gipanghatag nga mga iti sa poultry farms aron gamiton abuno, apan  wala magamit giingong gitapok lang sa mga kalsada ug maoy gidugokan sa mga langaw.

Nasuta usab sa Provincial Veterinarian nga si Louie Maestrado nga breeding season karong mga buwana sa langaw ug ang hugaw sa mga mananap sama sa iti maoy kinaham nilang butangan sa ilang mga itlog hangtud nga kini mapusa.  Busa giawhag karon nga kinahanglang hipuson ang maong mga iti sa mga poultry farms aron dili mosanay ang mga langaw.

Si Board Member Criselda Sanchez maoy usa sa mga nangulo sa pag-esplikar sa mga residente sa angay nilang buhaton. (/EIM)(BANAT NEWS)