Sakop sa fraternity gipatay

CEBU, Philippines - Patay ang usa ka giingong sakop sa usa ka fraternity human kini gipusil sa wala pa mailhing gunman, pasado alas- 2 sa nakalabay nga kaadlawon diha sa Kingswood Subdivision, Lipata, Minglanilla.

Ang biktima naila nga si Jundy Lasola, 28, nagpuyo sa maong dapit.

Matud pa ni PO2 Nikki Carlo Plarisan sa Minglanilla Police Station nga nahinabi sa Banat News nakadungog og sunod nga buto sa armas ang mga residente  nga gisundan og tingog sa motorsiklo kusog kaayong nipalayo sa ilang dapit.

Sa pagsubay sa mga residente sa maong lugar ilang nakita nga nagkadugo na ang biktima nga dunay igo sa nagkadaiyang parte sa iyang lawas ug wala na’y kinabuhi.

Nakuha sa kapulisan sa crime scene ang tulo ka basiyo sa .45 kalibreng bala ug usa ka slug nga gitohuan nga gigamit sa mipusil patay.

Sumala pa ni PO2 Plarisan nga ila na nga gipadaplin ang anggulo nga away sa fraternity ang hinungdan sa pagpamusil  tungod kay maayo na ang relasyon tali sa mga fraternity sa ilang lugar.

Ilang gitan-aw karon ang ubang anggulo basin dunay mga nakabikil ang biktima sa nanglabay nga mga adlaw. (BANAT NEWS)