Gibalibaran sa simbahan

CEBU, Philippines - Nadugangan ang kaguol sa usa ka pamilya kansang haligi sa ilang panimalay gitulis ug gipatay niadtong milabay’ng semana, tungod kay hangtud na sa pagpalubong niini gibalibaran sa simbahan bisan ang sakramento nga alang kanila alang unta kaniya kay matud pa gipasanginlan silang sakop sa usa ka kulto.

Ilubong na unta si Filemon Borden, 66, niadtong Domingo Hulyo 27 apan giingong gibalibaran sila sa St. Therese Parish sa Lahug ingon man sa St. Jude Parish sulod sa kampo sa Central Command.

"Nagpa-schedule mi July 21. Gidawat nila among gibayad nga P1,000. So nagtuo mi nga madayon g’yud ang lubong July 27, 1:30pm. Nahibulong na lang mi nga naay mianhi sa amoa. Gibalibaran mi kay di kuno pwede misahan akong Papa kay miyembro kuno og kulto. Giunsa gud intawon pagkakulto nga aktibo man gani ni sa kapilya," butyag ni Cristy Cañete nga anak ni Borden.

Usa ka Loloy Baldesamo ang giingong miadto sa haya ni Borden aron ingnon ang kabanay sa namatay nga di na madayon ang misa tungod kay nasuta nga dili Katoliko ug gani miyembro og kulto si Borden. Apan kini hugtanong  gihimakak ni Cañete kay di kini tinuod.

Gawas sa misa requiem sa simbahan, gibalibaran usab sila nga malubong ang lawas sa ilang amahan sa Cabantan Cemetery bisan nakabayad na sila apan giingnan nga di mahimong malubong didto ang patay kung di misahan sa simbahan.

"Gipatay na gani among Papa, ila pa gyung patyon og kadaghan? Grabe kaayo ilang gibuhat namo," pahungaw sa anak sa taxi driver nga gipatay human pusila sa tulisan samtang nanginabuhi alang sa iyang pamilya niadtong Hulyo 19, 2014 sa lungsod sa Consolacion.

Misuway pagkuha sa habig sa kura paroko sa St. Therese Parish Church nga si Monsinyor Roberto "Boy" Alesna ang Banat News kagahapon aron mangayo og katin-awan sa maong reklamo apan giingong wala kini sa kumbento.

Gisuwayan usab sa pagpangutana ang kura paruko sa  St. Jude Parish apan tua kini sa Manila.

Matud ni Cañete, dili myembro ang iyang amahan og kulto sama sa gipasangil kanila apan  miangkon silang misuporta kini sa usa ka kapilya nga gipatukod sa mga misyonaryo nga   Apostolic Catholic Church.

"Katoliko man gihapon na. So dili matawag nga laing relihiyon. Di mi kasabot nganong pasanginlan mi nila nga kulto. Aktibo sa kapilya ang akong Papa," ang anak namahayag kinsa mibutyag nga silang tanan binunyagan sa Romano Katoliko pagmatuod sa mga papeles nga ila untang gusto ipakita sa mga opisyale sa maong mga simbahan apan wala sila tagda.

Usa ka Monsinyor Modesto Delcino ang nag-lead sa mga misyonaryo nga nagtukod og kapilya sa ilang komunidad sa Sitio Panabang, barangay Apas, Cebu City.

Tungod sa pagbalibad sa simbahang Romano Katoliko, misahan ni Delcino si Borden sa Apostolic Catholic Chapel duol sa ilang balay ug didto ilubong sa CEMPARK karong adlawa, alas 2 sa hapon.  -/EIM) (BANAT NEWS)