Gi-ambush mao’y gisikop

CEBU, Philippines - Gidakop sa kapolisan sa lungsod sa Argao ang usa ka lalaki nga biktima sa pagpang-ambush gumikan kay wala’y lisensiya ang iyang armas nga gibalos pagpusil sa mga ni-ambush kaniya.

Sakay sa iyang motorsiklo si Roel Gomez, 27, taga Lengigon, Argao dihang gi-ambush siya niadtong Lunes sa hapon sa may Tonggo, barangay Taloot sa maong       lungsod.

Ang mga suspetsado giila nga sila si Fretchie Gecale, silingan sa biktima; Enrique Solis, Jemboy Selada ug Rocky Selada nga taga Bae, Sibonga.

Matud ni PO2 Renato Nacaytuna sa Agao Police Station nga nahinabi sa Banat News nga kalit lang gipusil sa mga suspek ang biktima kinsa naigo sa sampot ug nahulog sa motorsiklo.

Giingong nakahigayun pa pagkuha sa iyang dala nga armas si Gomez kinsa naka-kamang sa kanal sa karsada ug nakasukol og pusil sa mga suspek ug nahitabo ang pinusilay.

Ang kapolisan sa Argao ang daling naka-responde sa maong dapit samtang naka-ikyas ang upat ka suspek dihang nakabantay nga nag-paingon na ang kapolisan.

Naabtan sa kapolisan nga nagkadugo na si Gomez kinsa gidali pagdala sa Argao District Hospital ug gibalhin sa Vicente Sotto Memorial Medical Center (VSMMC).

Apan sa pagsubay sa kapolisan sa dalang .45 caliber pistol sa biktima nasuta nga wala’y lisensya hinungdan nga siya gidakop. Sa follow-up operation sa kapolisan sa “hide out” sa mga suspek, nasikop ang laing kauban sa grupo nga si Ronelo Davin nga nakuhaan og .357 revolver.

Matud ni Nacaytuna nga usa ka lokal nga grupo sa mga gun-for-hire ang mi-ambush ni Gomez ug may daan na nga bikil ang biktima ug si Gecale nga giingong lider sa grupo. Gipangita sa kapolisan ang mga suspetsado samtang gibantayan sa mga polis si Gomez sa tambalanan. - GMR) (BANAT NEWS)