Lumber gipalusot sa Bantayan
CEBU, Philippines- Gisakmit sa kapolisan ang ilegal nga mga kahoy balor og P111,714 sa sitio San Juan, barangay Patao, Bantayan.
Ang nasakmit mao ang duha ka kasko nga adunay gitas-on nga 23 ka tiil nga nagkantidad og P13,000, upat ka 840 board feet nga hot lumber nga lawaan nga nagkantidad og P43,680, 69 ka 992 board feet nga lawaan lumber nga nagkantidad og P51,584 ug 23 ka mga bamboo poles nga nagkantidad og P3,450.
Ang kapolisan sa Bantayan Police Station nakadawat og tawag gikan sa usa ka concern citizen mahitungod sa ilegal nga shipment sa mga kahoy sa maong lugar ug daling girespondehan.
Naabtan sa kapolisan sa maong lugar ang mga kahoy nga naglutaw daplin sa dagat ug nasakpan nga may lain pang mga kahoy nga gitagoan ilawom sa mga kawayan.
Matud ni Senior Insp. Jaime Santillan, hepe sa kapolisan sa Bantayan, nga ang mga kahoy gikan sa Masbate o Leyte gamit ang usa ka pumpboat nga miabot alas 7 sa gabii.
Bisan pa sa hiniusang pwersa sa kapolisan ug Department of Environment and Natural Resources-7 napakyas gihapon sa pagdakop sa mga tawong responsable sa pagpalusot sa mga kahoy. - /GMR) (BANAT NEWS)
- Latest
