Koral sa USC-TC giguba na

CEBU, Philippines- Gibungkag na sa University of San Carlos-Talamban Campus ang ilang koral agi og pagtuman sa hangyo aron mas molapad ang karsada sa maong lugar.

Gitumbok sa BanTal Traffic Management Council ang ka gamay sa karsada sa lugar ang hinungdan sa kahuot sa trapiko. Kini ang hinungdan nga gihangyo sa konseho ang mga pribadong establisemento sa lugar apil na ang USC-TC nga isibog  ang ilang mga building ug mga koral. Nalipay si Bise Mayor Edgar Labella nga nisanong ang mga establisemento sa ilang hangyo.

Samtang giawhag ni Labella ang mga motorista ug mga sumasakay nga mosayo og pila ka minutos gikan sa ilang naandan nga oras tinglakaw aron dili matanggong.

Sunod nga hatagan og pagtagad ni Labella ang U-Turn slot dapit sa Family Park.  - /GMR) (BANAT NEWS)