“Adik” nga brgy workers sa Ermita nadugangan

CEBU, Philippines- Napun-an na usab ang gidaghanon sa mga adik nga kawani sa Barangay Ermita ning dakbayan sa Sugbo human nangangkon ang laing walo ka empleyado sa barangay didto sa pangulo sa City Office for Substance Abuse Prevention (COSAP) nga sila tiggamitan sa ginadili nga drugas.

Matud ni Dr. Alice Utlang pangulo sa COSAP nga ang laing walo ka empleyado sa barangay personal nga midangop sa iyang buhatan ug miangkon nga sila tiggamitan sa ginadili nga drugas, usa kanila Barangay Environmental Officer (BEO) ug ang laing pito puros mga tiglimpyo sa kanal.

Kahinumdoman ang COSAP mipahigayon og surprise drug test sa samang barangay sa miaging semana diin onse sa 20 ka mga tanod niini ang miangkong tiggamitan sa ginadili nga drugas, usa ka garbage loader ug ang laing usa street sweeper.

Niabot na sa 21 ka mga empleyado sa barangay Ermita ang miangkon nga sila drug users.

Si Ermita Barangay Captain Felicisimo “Imok” Rupinta miingon nga iyahang sutaon kung si kinsa kining laing walo nga nidangop sa buhatan sa COSAP aron iyaha usab matangtang sa trabaho.

Ang mga nigawas nga adik sa gihimong drug test gitanyagan sa COSAP og libre nga out-patient rehabilitation. - /EIM) (BANAT NEWS)