LTO-Mandaue wala hatagi’g tubig

CEBU, Philippines - Dili tinuod nga ang Land Transportation Office (LTO) sa dakbayan sa Mandaue gisuplayan og tubig sa City Hall.

Adunay usa ka negosyante nga mipadala og hulagway sa Banat News nga nagpakita nga ang water tanker sa Mandaue nag-deliver og tubig sa LTO.

Nakita tuod sa hulagway nga ang water tanker nagparada sa atubangang bahin sa LTO ug ang dako’ng hose nga gikan sa water tank nagpaingon sa LTO Compound. Ang informer mireklamo kay ang LTO usa man ka nasudnon nga ahensya sa kagamhanan ug adunay kaugalingon nga budget

Si Engr. Marivic Cabigas, pangulo sa General Services Office (GSO) sa Mandaue City Hall, mipasabot nga daghan ang nagtuo nga ang tubig nga gihatod sa ilang water tanker alang sa LTO kay anaa man gipaagi ang hose sa compound sa LTO.

Matud ni Cabigas nga ang tubig gisuplay kini paingon sa Mandaue City Jail apan sanglit lapokon man kaayo ang karsada atubangan sa bilanggoan didto lang gipaagi ang hose sa LTO compound.

Si Cabigas nagkanayon nga ang kagamhanan sa Mandaue dugay ra nga nagtabang sa mga binilanggo sa City Jail kay wala kini suplay sa tubig.

Usa ka doktor ang kanunay’ng moreklamo ug namasangil og kahiwian sa mga nagdumala sa LTO sa dakbayan sa Mandaue. Gani adunay kaso nga pending karon sa Ombudsman batok sa kahera sa Mandaue LTO nga personal nga mi-hire og kawani nga gipatrabaho niya sa iyang opisina nga walay pagtugot. Matud ni Dr. Danilo Dionson nga katungdanan sa katawhan ang pagpadangat og mga reklamo kun may makita sila nga kahiwian sa mga opisyal ug kawani sa kagamhanan. (BANAT NEWS)