SWAT sa Talisay subhan

CEBU, Philippines - Ipahigayon ang inauguration sa Special Weapon and Tactics (SWAT) sa dakbayan sa Talisay ugmang adlawa diin gipaabot nga tambongan sa mga opisyal sa Police Regional Office-7 ug Cebu Provincial Police Office (CPPO).

Si Supt. Reycel Carmelo Dayon, hepe sa Talisay City Police Station (TCPS), nga nahinabi sa Banat News nagkanayon nga motambong usab ang mga opisyal sa ubang kalungsoran ug dakbayan sa unang distrito sa probinsiya sa Sugbo sa nahisgutang kalihukan.

Gibutyag ni Dayon nga ang SWAT mopasundayag karong Lunes sa pagtubag og “hostage taking” sa mga pasahero sa bus kung unsaon nila pag-deal ang mga suspetsado nga wala’y maangol nga mga biktima.

Ang kalihukan ipahigayon alas 7:30 sa buntag karong Lunes human sa flag raising atubangan sa City Hall.

Dugang ni Dayon nga si Senior Supt. Noel Gillamac, direktor sa CPPO, maoy nagpasiugda sa pagpatukod og SWAT sa mga dakbayan ug kalungsoran sa probinsiya.

Ang SWAT sa matag lungsod ug dakbayan magtinabangay sa pagtubag sa mga emerhensiya sa krimen.

Ang SWAT usab sangonan sa pagpatrolya sa mga suotong lugar aron ang mga badlongon magpanagana og buhat og krimen. - /GMR) (BANAT NEWS)