CEBU, Philippines - Gitinguha sa Police Regional Office-7 nga panindoton ang mga police stations sa rehiyon sama sa gihimo sa Cebu City Police Office.
Ang PRO-7 adunay programa aron pagpanindot sa mga istruktura sa mga police stations ug gani nahuman na ang bidding alang sa minor repairs ug face lifting.
Si PRO-7 Director, Chief Supt. Tom Bañas, mibutyag nga human sa bidding gipaabot na lang nga ma-implementar kini sa siyudad ug probinsiya sa Sugbo ug Bohol.
Gidugang ni Bañas nga human sa Sugbo ug Bohol, isunod ang Negros Oriental ug Siquijor alang sa beautification.
Gihulagway ni Bañas nga kun sundon lang gyud ang standard sa Camp Crame kinahanglan gyud ang katukuran sa mga bag-ong istruktura apan kuwang ang pundo maong maglisud sila pagpatuman.
Dugang ni Bañas nga makig-alayon sila sa mga lokal nga kagamhanan kay makatabang kini ilabi na sa pagdonar sa luna. (BANAT NEWS)