Babayeng negosyante gitulis

CEBU, Philippines - Mokabat sa P20 mil ang nakuha sa duha ka wala mailhing armadong tulisan human nila tulisa ang usa ka negosyanteng tag-iya sa Alpha Trucking Company sa Sangat, San Fernando.

Ang biktima naila nga si Tita Barro, 63, taga Pitalo, San Fernando.

Matud ni SPO2 Victor Bueno sa San Fernando Police Station nga tawag sa usa ka concerned citizen ang ilang nadawat bahin sa maong tulis hinungdan nga dali nilang girespondehan ang lugar. Base sa imbestigasyon nga samtang ang biktima nag-park sa ilang sakyanan daplin sa highway kuyog ang iyang anak nga si Marlie Barro, duha ka wala mailhing tawo nga nagsakay og motorsiklo ang kalit lang mition og pistola ug mideklarar og tulis.

Giingong wala’y plate number ang gisakyang Honda XRM nga motorsiklo sa mga tulisan.

Matud pa sa nakakita nga ang angkas nagsuot og long sleeves, shades ug gibana-banang may 5’2” ang gitas-on.

Nakuha sa mga tulisan ang sling bag nga adunay sulod P20 mil nga kwarta ug mga dokumento sa pagparehistro sa ilang sakyanan.

Sa hot pursuit operation sa kapolisan narekober ang usa ka sling bag nga gipanag-iya sa negosyante nga gibiyaan lang sa usa ka lugar samtang padayong gipangita ang mga tulisan. (BANAT NEWS)