Dswd-7: Way kawat nga nahitabo

CEBU, Philippines - Gihimakak sa tigpamaba sa Department of Social Welfare and Development kon DSWD-7 Leah Quintana nga dunay nahitabong pagpangawat sa mga relief goods sa mga kwarto sa Cebu International Convention Center (CICC). Matud ni Quintana nga nakurat sila sa maong taho dungan sa pagsalig nga di mahitabong mawad-an og relief packs kay dunay duha ka gwardiya nga 24-oras nga nagbantay sa pasilidad.

Ang maong mga relief goods gikan pa sa nagkalain-laing sector nga gidonar human sa pagkuso-kuso sa bagyong Yolanda.

Apan gumikan sa pagtumaw sa maong report gipaimbestigar na ni Gob. Hilario Junjun Davide III ang hitabo.

Gipahibawo ni Provincial Administrator Atty. Mark Tolentino si Davide sa giingong pagpangawat nga matud pa nakuhaan sa CCTV camera. Nagtuo si Davide nga ang mga tawong nag- repack sa mga relief goods ang posibleng nanghilabot niini.  - /EIM) (BANAT NEWS)