Pamilya nahilo sa boriring
CEBU, Philippines - Patay ang usa ka 7-anyos nga batang lalaki human kini gikatahong nahilo sa tinowa nga boriring nga gisaw-an sa tibuok pamilya nga biktima sa bagyong Yolanda sa ilang panihapon sa miaging hapon sa barangay Poblacion sa lungsod sa Bantayan.
Ang bata nga si John Clifford Negro namatay pasado alas 8:00 kagahapon sa buntag samtang giatiman sa Bantayan District Hospital. Sumala pa sa taho sa DYRF, nga unang mireklamo ang inahan sa namatay nga si Marivel, 38, nga nalipong siya human makakaon sa tinowa nga boriring, ug misunod ‘sab sa pagreklamo si Armando, 43, lakip na sila si Aidelyn, 15, Jophen, 17, Armando Jr., 14, Niña Marie, 9, Arbel, 5, Jahmeia, 2.
Matud pa nga pasado alas 4:00 nanihapon ang tibuok pamilya sulod sa ilang tent, tungod kay biktima ni sila sa bagyong Yolanda. Apan nangahilo man hinuon sila sa ilang gisuwa nga boriring hinungdan nga gidala sila sa Bantayan District Hospital.
Mihangyo pa unta si John Clifford nga mouli na lang sila sa ilaha apan nakabsan gyud kini sa iyang kinabuhi.
Human sa kamatayon ni John Clifford gibalhin dayon sa Vicente Sotto Memorial Medical Center ang nahibiling miyembro sa pamilyang Negro.
Luwas na hinuon ang kahimtang sa pamilya sa pagkakaron nga pabilin pang naa sa tambalanan. - /EIM) (BANAT NEWS)
- Latest
