CEBU, Philippines- Duha ka drayber sa motorsiklo ang nangamatay dihang nagkasungag ang ilang mga motor sa Barangay Daan, Catmon sa nakalabay nga hapon.
Ang mga biktima naila nga sila si Leodiben Molat, 19, taga Maga-as, Catmon ug Esmeraldo Mag-asin, 52, taga Sitio Pasomanos, Dawis Sur, Catmon.
Matud pa ni PO2 Ben Nabales sa Catmon Police Station nga nahinabi sa Banat News gikan sa managlahing direksyon ang duha apan pag-abot sa maong lugar mi-overtake sa nag-estambay nga sakyanan si Mag-asin apan nasugatan niini si Molat.
Gumikan matud pa sa kakusog sa impact nanglupad gikan sa ilang motorsiklo ang mga biktima ug nangabunal sa dalan.
Dali gilayon nga gidala sa Sogod District Hospital ang duha ka biktima apan patay na si Molat ug paglabay sa pipila ka oras nakabsan ‘sab sa kinabuhi si Mag-asin.
Matud pa parehong wa magsuot og helmet ang duha. Sumala pa sa mga eksperto, dako og tsansang mabuhi gikan sa mga aksidente ang magsuot og helmet tungod kay di mapantok ang ilang mga ulo. - /EIM) (BANAT NEWS)