Nangaon gikawatan og P100T, cellphone
CEBU, Philippines- Nahanaw ang P100,000 nga salapi ug cellphone balor og P30,000 sa usa ka kustomer sa Mang Inasal sa Park Mall North Reclamation Area sa dakbayan sa Mandaue niadtong Domingo sa gabii nga gituohang gikawat sa wala pa hiilhing kawatan.
Si SPO1 Michael Limalima miila sa biktima nga si Junalyn Bernas, 35-anyos, taga Deca Homes, Tungkil, lungsod sa Minglanilla.
Kuyog sa biktima ang iyang sakop sa pamilya sa pagsulod sa nahisgutang kan-anan alang unta sa ilang pagpanihapon.
Giingong misulod lang sa pansayan aron pagpanghunaw sa kamot ang biktima apan pipila lang ka gutlo sa pagbalik pa niini nahanaw na ang iyang shoulder bag nga gibutang sa lingkuranan.
Sulod sa maong shoulder bag nga nahanaw ang usa ka cellphone, salaping cash nga P100,000, driver’s license, ATM card ug uban pa nga mahinungdanong dokumento.
Si Limalima miingon nga mohimo sila og dugang pakisusi sa maong hitabo nga naglakip ang pagsuta kun may CCTV camera ba ang maong establisemento. - /GMR) (BANAT NEWS)
- Latest
