CEBU, Philippines - Nipatim-aw sa buhatan sa Provincial Investigation and Detective Management Branch ang Ghanian kinsa giingong gibuhian sa hepe sa kapolisan sa Compostela aron paglimpyo sa iyang ngalan.
Ang suspek nga si Alexander Painstil, taga lungsod sa Daanbantayan, miduso sa iyang sworn affidavit nga matud pa wala gyud siya makahatag bisan piso ngadto sa hepe nga si Samuel Romanillos.
Gani mipailawom pa sa drug test si Painstil apan negatibo ang resulta.
“Kung marijuana man gud dili na mu-detect sa drug test mas maayo unta to kung blood test gyud but we cannot force him kay iyaha na gani na voluntary,” matud ni PO1 Luchin Dinopol, imbestigador sa PIDMB.
Apan matud ni Dinopol dili sila makahatag og gibug-aton sa maong mga affidavit kay ang pre-charged evaluation nagtuyok sa pangutana kun nganong gibuhian ni Romanillos si Painstil bisan pa man nakuhaan kini og ebidensiya.
“Sa manaay kwarta o wala ang pangutana diha kung nganong iyang gibuhian nga duna may evidence recovered bisan pa man kung unsa kagamay sa marijuana nga nakuha ug dili ang question sa kwarta,” matud ni Dinopol.
Dugang niya nga ang mga affidavits i-attach isip supporting documents sa mga giduso ni Romanillos alang sa pre-charged evaluation.
Ugma sila si PO3 Arni Goc-ong ug PO2 Romeo Rubilla moduso usab sa ilang mga affidavits ngadto sa PIDMB.
Nasayran nga si Painstil ug ang asawa nagub-an sa sakyanan sa Compostela hinungdan nga nagpaayo kini.
Samtang nagpaabot, mihithit si Painstil og usa ka stick nga marijuana hinungdan nga nasakpan sa kapolisan samtang nagpahigayon og pagpatrolya.
Nasikop si Painstil apan gibuhian human giingong mihatag og P50,000 mil ang asawa.
Si Romanillos girelibohan na ug pasakaan og kasong administratiba. (Ria Mae Y. Booc/GMR)
Karsada sa Tanke pahawanan
Pahawanan ang kadalanan sa barangay Tanke, dakbayan sa Talisay aron dili maglisud pagpatrolya ang kapolisan sa lugar nga gihugpaan sa ginadiling drugas.
Matud sa hepe sa kapolisan sa dakbayan, Supt. Reycel Carmelo Dayon, nga ang karsada sa Tanke naghuot kay daghang mga naninda sa daplin gani ang uban milapas na gyud sa karsada nga usa sa hinungdan nga maglisud sila sa pagpatrolya.
Sa niaging adlaw, gisusi sa kapolisan ang lugar ug namadlong sa mga traysikad ug traysikol nga magpataka lang og parade.
Matud ni Dayon nga gihangyo nila ang mga tag-iya og tindahan nga milapas sa karsada nga ipaguba nila ang extension diha sa karsada aron mahawan ug sayon ang ilang pag-agi.
Ang hepe mibahad nga kung dili gub-on sa tag-iya sa mga tindahan ang extension niini nga milapas na sa karsada sila na ang moguba.
Sunod semana gikatakdang ilang balikon ang lugar aron masusi kung mituman ba ang mga tag-iya sa tindahan sa ilang saad sa pagguba sa mga extension.
Matud ni Dayon nga ang Tanke maoy ilang “pilot area” diin ilang limpiyohon ang ginadiling drugas.
Si Dayon midawat sa hagit sa hepe sa Cebu Police Provincial Office alang sa higpit nga operasyon batok sa ginadiling drugas.
Nunot niini, duha ka lalaki kinsa giingong paingon untang mosuyop og shabu ang nasikop sa gipahigayong operasyon sa kapolisan sa Talisay ug Regional Anti-Illegal Drug Special Operation Task Group-7 niadtong Huwebes sa hapon sa sitio Galaxy sa maong barangay.
Ang mga nasikop giila nga sila si James Joseph Lapasaran, 25, residente sa nahisgutang lugar, ug Arnel Juarez, 26, taga Barangay Cuanos, lungsod sa Minglanilla.
Naimbargo sa mga polis gikan sa posesyon sa mga suspetsado ang duha ka paketeng shabu ug mga shabu paraphernalia.
Ang subject sa buy-bust operation nga sila si Bartolome Fajardo Ibatos ug Jumar Pantollana ang daling nakasibat dihang nakabantay kini sa mga polis.
Mikabat sa 14 ka paketeng shabu, usa ka kalibre .22 nga pusil ug unom ka bala ug P470 nga gituohang halin sa ginadiling drugas ang na-recover sa mga polis gikan sa balay sa mga suspetsado.
Si PO2 Elmer Gahi kinsa kuyog sa operasyon mibutyag sa Banat News nga usa ka semana nilang gipanid-an si Ibatos una pa sila mipahigayon og buy-bust. Dugang ni Gahi nga si Pantollana ilaha kining nadakpan niadtong milabay’ng buwan sa Marso tungod sa paghupot og ginadiling drugas apan mipiyansa ang suspetsado alang sa iyang temporarayong kagawasan. (BANAT NEWS)