CEBU, Philippines - Dili angayan himoong waterpark ang sapa sa Mananga sukwahi sa tinguha ni Talisay City Mayor Johnny Delos Reyes nga himoong tourist spot ang maong lugar.
Kini gumikan kay dili permanente ang tubig ug dili sama sa Loboc River sa lalawigan sa Bohol.
Nunot niini ang Department of Environment and Natural Resources-7 miingon nga moagi sa taas nga proseso ang tinguha ni Delos Reyes ilabi na nga usa ka forest land ang lugar.
Atol sa State of the City Address ni Delos Reyes, iyang gibutyag nga himoong tourist spot ang Mananga River diin pahimoan niya og waterpark aron makasulod ang mga fastcraft ug jetski.
Apan matud sa tigpamaba sa DENR-7, Eddie Llamedo, nga kinahanglan ang Environmental Compliance Certificate kung ang proyekto molapas sa 1,000 metro kwadrado. Si Llamedo midugang nga kung buhatan og waterpark ang sapa kinahanglan usa ka kilometros ang gilay-on gikan sa sapa aron maprotektahan ang istruktura sa Mananga River. Gawas niini magkinahanglan usab ang mayor og sketch plan, area clearance nga i-issue sa DENR, ordinansa ug resolusyon gikan sa konseho sa dakbayan ug barangay aron suportahan ang iyang proyekto.
Gihulagway ni Llamedo nga dili dali ang maong plano ug mag-agi pa kini og taas nga proseso una masugdan sama sa pagpahigayon og full assessment sa lugar, mga mitigating measures ug mga programa nga himoon alang na sa kaayuhan sa kalikupan. Tungod niini, gihangyo sa DENR-7 si Delos Reyes nga laing proyekto lang una ang ipatuman nga makatabang gihapon sa iyang mga konstituwente.
Pipila ka sakop sa konseho sa dakbayan sa Talisay supak sa plano sa mayor tungod kay delikado kini ug mao na hinoon ang hinungdan nga dunay kalamidad nga mahitabo sa siyudad. (/GMR)(BANAT NEWS)