Mga bodega ipasusi

CEBU, Philippines - Giawhag sa kagamhanan sa dakbayan sa Sugbo ang mga awtoridad sa pagsusi sa mga bodega sa bugas, ahos ug ubang produkto sa merkado aron mapakgang ang posibleng pagtago sa mga baligya hinungdan sa pagmahal sa presyo. Ang awhag gipadangat ngadto sa National Bureau of Investigation (NBI) ug ubang ahensiya nga tigpatuman sa balaud.

Giduso ni Konsehal Alvin Dizon ang resolusyon nga nag-awhag sa mga awtoridad nga hingusgan ang kampanya batok sa tigtago og bugas.

Kini gumikan kay ang pagtago sa bugas ilegal nga gihimo sa ubang negosyante aron kung monihit na ang bugas, motaas na ang presyo niini.

Giawhag usab ni Dizon ang publiko nga iyang giduso nga tabangan ang mga awtoridad sa pagtultol ug pag-ila sa mga bodega nga posibleng gitagoan sa mga supply.

Subay sa Presidential Decree No. 4 o ang National Grains Authority Act, bisan kinsang masakpang magbuhat sa pagtago sa supply mamahimong mapriso og dili mo-ubos og unom ka buwan ug usa ka adlaw hangtud upat ka tuig ug mamahimong makamulta og dili mo-ubos sa P4,000 hangtud sa P8000. (/GMR)(BANAT NEWS)