CEBU, Philippines - Gimando nga suspensuhon ug way sweldo sa tulo ka buwan si Konsehal Socrates Fernandez sa dakbayan sa Talisay tungod sa pagpagamit sa sakyanan sa gobiyerno ngadto sa laing tawo samtang siya pa maoy mayor.
Niadtong Abril 25, 2013 ang Public Assistance and Corruption Prevention Office (PACPO) sa Office of the Ombudsman-Visayas mipasaka og “administrative case for misconduct” batok kang Fernandez.
Ang sakyanan gipamaneho ni Fernandez kang Benedict Gabasa kinsa way lisensya ug nakuhaan pa gyud og mga drug paraphernalia sa mga polis dihang nadakpan sa Bulacao sa habig sa dakbayan sa Sugbo niadtong Septiyembre 13, 2010.
Si Gabasa usa ka job order sa siyudad sa Talisay ug nadestino kining motabang sa feeding program sa siyudad. Nasuta usab nga way trip ticket ang paggamit niini sa sakyanan. Ang PACPO nagkanayon nga si Fernandez maoy manubag sa sakyanan sa gobiyerno nga giisyu ngadto kaniya ug liable siya niini sa pagpagamit kang Gabasa kinsa nagmaneho nga walay lisensiya ug trip ticket.
Namatud-an sa Ombudsman-Visayas nga daghang kalapasan nga nahimo si Fernandez ug si Gabasa gikan sa traffic laws ug sa Commission on Audit(COA) apan dili matawag nga misconduct ang kang Fernandez kondili simple neglect of duty ra. Ang desisyon gipirmahan kini ni Ombudsman Conchita Carpio Morales niadtong Hunyo 17, 2014.
Hinuon posibleng dili maimplimentar ang silot tungod kay nakadaog man siya sa pagka-konsehal subay sa Aguinaldo Doctrine. (/EIM)(BANAT NEWS)