“Drug protector” gikasohan
CEBU, Philippines - Gipasakaan kagahapon og kaso ang polis nga gidudahang “drug protector” nga si PO2 Bernardito Almieda diha sa piskalya sa mga sakop sa Provincial Intelligence Branch.
Kasong kalapasan sa Republic Act 9165 or Comprehensive Dangerous Drugs Act ang giatubang sa maong polis kinsa gipaubos dayon sa inquest proceedings, si Almieda nipili nga dili na lang mo-file og counter-affidavit aron mokontra sa mga alegasyon batok kaniya ug mipadayag nga iyang atubangon ang kaso diha sa korte.
Si State Prosecutor Jerome Abarca nagkanayon nga ang gi-file nga kaso batok ni Almieda kay Section 5 (coddler or protection), Article II of RA 9165.
Si Abarca mirekomendar og P200,000 nga piyansa kang Almieda.
Ang kauban ni Almieda nga nadakpan si Zeev Tulod mipili usab nga dili mo-file og counter-affidavit sa kasong Section 5, Article II of RA 9165 kay atubangon niini sa korte ang sumbong batok kaniya.
Ang duha nadakpan niadtong Lunes sa barangay Poblacion, Borbon sa mga sakop sa Provincial Intelligence Branch kinsa nagpahigayon og buy-bust operation batok kang Edwin Cabahug.
Si Cabahug nakaipsot sa maong operasyon apan gipasakaan gihapon siya’g kaso. (BANAT NEWS)
- Latest
