CEBU, Philippines - Sikop sa City Intelligence Branch (CIB) ang duha ka mga lalaki nga nakuhaan og mga armas ug marijuana atol sa ginukdanay gikan sa checkpoint sa Barangay Busay ug hangtod sa ma’y JY Square, Lahug, Cebu City, pasado alas-8 sa nakalabay nga gabii.
Ang mga dinakpan naila nga sila si Christien Marlon Pansoy, 21, taga East Poblacion, Naga City, drayber sa Mitsubishi Adventure nga duna’y plate number GJW 421 ug ang kauban niini nga si Carlo Anthony Morales, 21.
Matud pa ni Superintendent Romeo Santander ang hepe sa CIB nga nagbutang sila og checkpoint tungod sa impormasyon nga dunay sakyanan nga nagdala og marijuana gikan sa Balamban. Dihang nasigpatan ang sakyanan gipara kini apan mipasirit mao nga gigukod ug naabtan sa Lahug human napusilan ang ligid niini.
Nakuha sa kapulisan gikan sa duha ka mga dinakpan ang 9mm pistol nga dunay lima ka bala , .9mm magnum revolver nga dunay upat ka bala ug ang mga salin sa marijuana sulod sa bag sa mga suspek.
Apan pipila ka minutos ang milabay usa ka drayber sa taxi ang mi-turnover og usa ka daku nga bag nga duna’y sulod nga lima ka kilong marijuana nga iyang napunitan kilid sa gutter sa dalan di layo sa nahitaboan nga gituohang gilabay sa mga suspek. (BANAT NEWS)