‘Libreng Sakay’ nakaminus sa kita sa mga traysikol

CEBU, Philippines - Nagbagolbol ang mga drayber sa traysikol tungod kay ang ilang kita nakuhaan nunot sa pagpatuman sa kagamhanan sa dakbayan sa Talisay og “Libreng Sakay” sa bus. Ang mga traysikol kung hapon na mag-atang kini og pasahero nga mamauli diha sa Tabunok.

Apan dihang naa nay libreng bus nga masakyan giingong naminusan na ang ilang kita kay adto na man mosakay ang mga pasahero sa bus.

Ubang mga pasahero mosakay kaniadto og public utility jeepney kutob sa Tabunok aron mosakay og traysikol paingon na sa ilang mga balay.

Karon duha na ang bus nga manghakot og mga pasahero sa may South Road Properties sa dakbayan sa Sugbo paingon ngadto sa Talisay gamit ang kaugalingong kwarta ni Mayor Johnny De los Reyes. Si De los Reyes mibutyag nga matag semana mogasto siya og P5,000 alang sa krudo sa bus.

Ang maong bus magbiyahe kini aron manghakot og mga pasahero diha sa SRP gikan sa Lunes hangtud lang sa Biyernes.

Hinuon ang maong bus sa mayor mokita usab tungod kay dunay moabang niini matag Domingo ug maoy gamiton sa mayor sa pagpalit og krudo.

Gani nagplano ang mayor nga ipaabot sa SM City Cebu ang pagbiyahe sa bus. Ang mayor nagkanayon nga gibati siya og kalooy sa mga pasahero nga magbarug sa may SRP ug mohangyong mosakay sa mga sakyanan nga moagi bisan pribado.

Mokabat sa 70 ka tawo ang masulod sa bus diin uban niini magbarug. (Brenda D. Batuto/GMR)

Tips batok sakit sa ting-uwan

Nihatag og tip ang Department of Health-7 batok paglikay sa mga sakit panahon sa ting-uwan.

Si Dr. Joanri Riveral, coordinator sa Food and Water Borne Diseases sa DOH-7, miingon nga panahon sa ting-uwan sagad sa mga sakit nga motumaw makuha sa kontaminadong tubig ug pagkaon.

Gipadayag ni Riveral nga ang mga sakit nga posibleng motakboy mao ang leptospirosis, suka-kalibang, tipos, cholera, amoeba, hepatitis ug uban pang sakit nga makuha sa kontaminadong tubig ug pagkaon.

Tungod niini ang DOH-7 miawhag sa katawhan nga kinahanglang likayan nga masamdan ug kanunayon gyud ang paglimpyo sa palibot aron malikay sa mga nahisgutang mga sakit.

Lakip sa gibantayan sa DOH-7 ang mga giandam nga evacuation centers panahon sa katalagman.

Gihimug-atan sa DOH-7 nga kanunay silang nag-monitor ug andam sila sa pagtubag sa mga bisan unsang emerhensiya nga motumaw. (BANAT NEWS)