CEBU, Philippines - Patay ang usa ka traffic enforcer sa Cebu City Traffic Office Management (CITOM) human kini nabanggaan sa usa ka awto nga gimaneho sa usa ka Koreana diha sa Governor Cuenco Avenue, Banilad, Cebu City niadtong Martes sa gabii.
Ang biktima naila nga si Maria Theresa Bascones, 38, lumad nga taga Villa Kauswagan, Basak Pardo ning dakbayan.
Samtang ang drayber nga Koreana naila sab nga si Heo Sun Kyung, 49,lumad nga taga Seoul, South Korea, nga temporaryo nga nagpuyo sa Barangay Apas, Cebu City.
Si Heo nagmaneho sa usa ka Hyundai Tucson Wagon nga nagdala sa plate number YEF 614, gitanggong na karon sa karsel ang maong langyaw.
Matud pa ni Joy Tumulak ang Operations Chief sa Cebu City Traffic Operations Management (CITOM) nga nahinabi sa Banat News nga samtang nagdumala sa trapiko si Bascones sa maong lugar, kalit lang kini nga nadagit sa sakyanan ni Heo.
Tungod sa kakusog sa pagbangga nalagpot si Bascones ug nalukot sa kalsada, dali gilayon kining gitabang sa mga tawo ug gidala sa Emergency Response Unit (ERUF) sa Perpetual Soccor Hospital.
Apan sumala pa ni Tumulak nga pasado alas-5 kagahapon sa kaadlawon gipahibalo siya sa pamilya ni Bascones nga nakabsan na kini sa iyang kinabuhi.
Sumala pa ni Tumulak nga talagsaon ra kaayo ang mahitabo nga susamang aksidente apan matud pa nga sayod na’ng daan ang mga traffic enforcers kung unsa kapeligro ang ilang trabaho.
Dugang pa ni Tulumak nga unta magbantay ang mga motorista nga dili magpataka pagpakusog og dagan ilabina kung duna’y intersections tungod kay sagad adunay traffic enforcer nga nag-man sa traffic. “Tawo ra pud na ang atong mga enforcers, busa dapat magbantay pud unta ang mga drayber. Kanang atong mga enforcers nakabalo na g’yud na sila always alert lang g’yud kay naa man sila sa tunga sa kalsada,” pahimangno pa ni Tumulak. Matud pa sa opisyal nga 12 na ka tuig nga nagtrabaho isip traffic enforcer si Bascones, nga gihulagway ni Tumulak nga usa ka tarong nga traffic enforcer.
Hinoon gipasabot ni Tumulak nga ang pamilya sa langyaw ang mao ‘sab diay mitabang sa tanan nga galastohan sa pamilya ni Bascones, diin andam sab nga motabang ang Cebu City Government sa paghatag sab og tabang pinansyal sa paghipos sa patay nga lawas sa maong traffic enforcer.
Gikustodiya na sa Tourism Police ang maong Koreana nga posibleng mag-atubang og kasong reckless imprudence resulting to homicide. (BANAT NEWS)