Mga pasahero natanggong kang Glenda

CEBU, Philippines - Kapin usa ka libo ka pasahero  sa Central Visayas ang nangatanggong sa nagkadaiyang pantalan ug tugpahanan ilabi na sa Cebu City tungod sa bagyong Glenda.

Sumala pa sa Philippine Coast Guard dul-an sa 20 ka mga barko ang wa tuguti nga makalarga sa ilang mga destinasyon tungod sa bagyo.

Matud ni Philippine Coast Guard –Cebu Station Commander Rodolfo Villajuan ang mga barko nga gidid-an pagbiyahe nanukad sa pantalan sa Aduana, Tinago, Mandaue, Danao, Camotes, Bantayan, Hagnaya, ug Naga nga wala makabiyahe paingon Ormoc, Calbayog, Tagbilaran, Masbate, Catbalogan, Leyte, Hilongos, Panay, Bantayan, Catanduanes ug Sorsogon.

Samtang sa Medillen, duha ka mga dagkong pumpboats nga nagkarga og ginamos ang nangaunlod sa baybayon samtang nagpadung og dunggo tungod sa kadagko sa bawod.

Ang Philippine Atmospheric Geophysical and Astronomical Service Administration (PAGASA) sa ilang bahin mipahibawo nga tungod sa bagyong Glenda giingong zero visibility kagahapon ang Isla sa Bantayan samtang nakasinati og kusog nga huros sa hangin ang northern Cebu.

Daan nang mipahimangno ang PAGASA sa mga nanimuyo daplin sa kabaybayonan ug kasapaan ingon man ang naa sa tiilan sa mga bukid nga magmatngon

Sukad pa sa milabay’ng adlaw, alerto  sud sa 24-oras ang Office of Civil Defense (OCD 7), Central Command (CENTCOM) ug ang Cebu Provincial Police Office (CPPO) sa posibleng epekto sa bagyo.

Si Oliva Luces ang Regional Director sa Office of the Civil Defense (OCD7)  nagkanayon nga tulo ka adlaw sa wala pa nakasulod sa nasud ang bagyong Glenda, gipasidan-an na nilang daan ang mga lugar nga posibleng maapektahan.

Samtang ang Central Command pinaagi sa labing labaw nga opisyal nga si Lt. Gen. John Bonafos miingon nga gialerto niya ang tanang sakop aron makaresponde.

Samtang ang kapulisan sab sa probinsya sa Sugbo mibutyag nga nakapangandam ang ilang mga police stations sa pag-abot ni Glenda ug way gitugotang maka-leave.

Tungod sa bagyo, daghang flights ang gikanselar ilabi na sa mga lugar nga maigo sa bagyo nga maoy destinasyon o gigikanan sa mga abyon.

Ang Cebu Pacific Air mikanselar sa unom nila ka biyahe gikan sa kaulohan paingon sa Legaspi, duha gikan sa Manila paingon sa Naga ug ang biyaheng gikan sa Cebu paingon sa Legaspi.

Samtang ang Air Asia mikanselar usab sa ilang mga biyahe paingon sa Surigao. Ang Philippine Airlines mikanselar ‘sab sa ilang 30 ka mga biyahe, diin 26 niini domestic flights samtang ang upat mga international flights.

Gumikan sa mga kakulian nga mga nasugatan sa ilang mga pasahero, ang  airline companies miawhag sa mga na-stranded nga bisitahon ang ilang mga sangang buhatan aron magpa-rebook sa ilang biyahe. - /EIM) (BANAT NEWS)