CEBU, Philippines- Naka-eskapo ang anak apan nasikop ang amahan sa gihimong ronda sa kapolisan sa ilang panimalay nga gihimong suyopanan sa barangay Talangnan, Madridejos niadtong Sabado sa gabii. Ang nasikop mao si Eduardo Cañete, 52, may live-in partner, samtang ang naka-ikyas mao si Jolito Cañete, 35 ug usa ka Rodel Desuyo nga taga Barangay Tarong sa maong lungsod. Matud ni PO2 Jeffrey Barco, imbestigador sa Madridejos Police Station, nga nahinabi sa Banat News nga dugay na sila nga nakadawat og impormasyon sa pagpamaligya og ilegal nga drugas sa amahan ug anak.
Sumala pa ni Barco nga shabu ug marijuana ang gibaligya sa amahan ug anak ug sa ilang panimalay ra magsuyop pinaagi sa pagbayad og P20.
Atol sa buy-bust operation, nakabantay ang anak nga si Jolito nga polis ang iyang kaatubang ug abtik kining nakadagan. Nakuha sa kapulisan ang pito ka medium sized sa marijuana, usa ka paketeng shabu, P500 nga marked money ug P220 nga gituohang halin. - /GMR) (BANAT NEWS)