CEBU, Philippines- Nagpatabang sa mga opisyal sa dakbayan sa Talisay ang kapitan sa barangay Manipis, Emma Cabiluna, kabahin sa pagpamutol sa mga kahoy sa ilang barangay.
Kini human napalgan sa ibabaw’ng bahin sa Sitio Langoyon ang 25 ka putol sa Mahogany ug laing tulo pa ka pinutol ang nakit-an sa may sapa. Makita sa maong barangay ang mga Pine tree, Teak tree, Mahogany ug uban pang klase sa mga kahoy apan mabantayan nga hinay-hinay nang nangawagtang.
Gikatahong ang mga kahoy nga putlon ipamaligya sa mga mamuhatay og furniture ug ang mga gagmay’ng sanga ibaligya para isugnod.
Sila si Konsehal Antonio Bacaltos, Jr. chairman sa committee on environment sa konseho sa dakbayan, ug Doroteo Emit, miyembro sa komitiba uban sa mga polis ang daling misaka kagahapon ngadto sa Manipis. Nakita sa grupo ang mga pinutol nga kahoy apan wala’y mitug-an kung kinsa ang namutol.
Si Cabiluna nga nahinabi sa Banat News mibutyag nga duna na’y gibutang nga forest guard ang Department of Environment and Natural Resources (DENR) diha sa ilang lugar apan giingong mahadlok kining modakop tungod kay mga armado ang mga mamutol.
Plano sa mga opisyal nga mohangyo ngadto sa hepe sa kapolisan sa dakbayan nga magbutang og checkpoint sa maong lugar. - /GMR) (BANAT NEWS)