CEBU, Philippines - Gipangandaman sa mga opisyal sa Barangay Umapad, dakbayan sa Mandaue ang mga katalagman sama sa sunog ug pagbaha pinaagi sa pagbansay daan sa ilang mga lumolupyo kun unsay ilang himuon sa higayon nga moabot ang kalamidad.
Ang gihimo sa mga opisyal sa Umapad kabahin kini sa gimbuhaton sa Barangay Disaster Risk Reduction and Management Council nga gipangulohan ni Kapitan Nelson Rubio. Miingon ang kapitan nga mabalaka gayud sila panahon nga adunay kusog nga ulan kay pipila ka dapit sa ilang barangay makasinati man og lunop. Ang mga opisyal sa barangay nagmugna og lainlaing cluster nga gitahasan pag-atiman sa lainlaing katalagman sama sa pagbaha, pagdahili sa yuta ug sa mahitabong sunog. Nakabaton na sila og rubber boat nga magamit pagresponde kun adunay lunop-baha, mga flashlight, mga kapote, botas ug uban pa. Ang lainlaing cluster nga gimugna mao ang Butuanon River Cluster, Kabukiran Cluster, Kadagatan Cluster ug uban pa. Ang kapitan sa barangay maoy overall chairman sa mga clusters.
Matud sa kapitan nga nagpadayon ang pagpalawom sa kanal sa Sitio Batiller nga gigahinan kini og minilyon ka pesos aron kaagian sa tubig paingon sa Mactan Channel. Atol sa pagbunok sa kusog nga uwan niadtong Huwebes sa gabii adunay mga dapit sa barangay nga wala na maglunop dili sama sa nangaging katuigan nga wala pa palawmi ang kanal. Ang mga opisyal sa Barangay Umapad nangandoy nga makaangkon sila og firetruck aron dali ra ang pagresponde kun may sunog. (BANAT NEWS)