Lolo gidakop sa kasong lugos

CEBU, Philippines - Bag-ong nakadawat og P1,500 nga insentibo sa kagamhanan, usa ka 70 anyos nga lalaki ang gidakop sa kapolisan tungod sa kasong pagpanglugos sa 7-anyos niyang apo. Gihimo ang pagdakop alas 10 pasado kagahapon sa buntag gawas sa covered court sa barangay Tabok, dakbayan sa Mandaue, diin nagtapok ang kapin 500 ka senior citizens nga nagpaabot sa pagdawat sa ilang insentibo.

Ang gidakop mao si Diosdado Alomendras, biyudo, pinasikad sa warrant of arrest nga giluwatan ni Judge Mercedita Dadole Ignacio sa Branch 28 sa Regional Trial Court sa maong dakbayan.

Ang anak mismo sa akusado nga amahan sa bata ang mipasaka sa kaso upat na ka buwan ang nakalabay. (Romeo T. Limpangog/GMR)

Tinun-an nakuryentehan

Patay ang 15-anyos nga tinun-an human natamaki ang kuryente sa iyang gi-switch on nga compressor machine kagahapon sa buntag sa sitio Bildohan, Umapad, dakbayan sa Mandaue.

Ang namatay mao si Junrel  Alferez, grade VI sa Umapad Elementary School.

Si Umapad Barangay Kapitan Nelson Rubio nga nahinabi sa Banat News miingon nga nagsul-ob na ang biktima sa iyang uniporme.

Sa paggawas sa biktima sa ilang panimalay maoy nakita ang PUJ nga gimaneho sa iyang maguwang nga kuwang sa hangin ang ligid nga maoy nakaaghat kaniya sa pagpagawas sa compressor machine aron sa pagpahangin sa mga ligid.

Matud ni Rubio nga pag-switch on sa compressor machine, kalit lang nikirig sa iyang gibarugan ang biktima ug natumba sa naglanaw nga tubig nga grounded usab sa kuryente. (/GMR)(BANAT NEWS)