CEBU, Philippines - Miangal ang hepe sa Mabolo Police Station sa gibuhat sa mga opisyal sa barangay Mabolo, dakbayan sa Sugbo human nanakop og mga video carrera ug mga moli-moli nga wala’y kaubang polis.
Gipasabot ni Sr. Insp. Hartzel Bellido, hepe sa Mabolo Police Station, nga nahinabi sa Banat News nga delikado kaayo ang gibuhat sa mga opisyal sa barangay ilabi na kung duna’y mosukol.
Gipadayag ni Bellido ngadto kang Kapitan Rey Ompoc ang iyang obserbasyon aron dili na masubli.
Niadtong higayuna, ang kapolisan sa Mabolo nipahigayun usab og checkpoint ug wala’y makakuyog sa mga opisyal sa barangay.
Matud ni Bellido nga importante ang presensiya sa polis sa maong operasyon sanglit sila man ang ipatawag sa korte kung ipasaka na ang kaso.
Gisubay usab karon ni Bellido ang taho nga polis ang tag-iya sa mga video carrera ug moli-moli nga nakuha. (/GMR)(BANAT NEWS)