Calamity assistance gipang-uli

CEBU, Philippines - Giuli sa pipila ka mga konsehal sa dakbayan sa Sugbo ang nakontrobersyal nga P20,000 nga calamity assistance nga gipang apod-apod ngadto sa mga opisyal ug mga kawani sa City Hall.

Unang miuli si Konsehal Alvin Dizon sa niaging adlaw ug gisundan ni Konsehal Roberto Cabarrubias kagahapon sa buntag.

Ang administrative aide ni Dizon nga si Ronald Mauren miuli usab sa P20,000 kagahapon.

Sa iyang bahin, si Konsehal Dave Tumulak mipadayag nga iyang girespeto ang pag-uli sa iyang kaubanan sa kwarta.

Matud niya nga angayang resolbahon una ang reklamo nga gipasaka may kalabutan sa maong pondo.

Andam mouli si Tumulak sa iya usab nadawat sa higayun nga momando ang Malakanyang diin gisang-at ang reklamo. (/GMR)(BANAT NEWS)