Acetylene gang gipabantayan

CEBU, Philippines - Naka-alerto karon ang kapolisan sa dakbayan sa Sugbo gumikan sa posibleng pag-ataki sa acetylene gang human napakyas ang maong grupo sa pagbiktima sa usa ka bangko sa dakbayan sa Naga niadtong Martes.

Matud ni Supt. Romeo Santander,  hepe sa City Intelligence Branch (CIB) nga gimandoan na nila ang tanang station chiefs nga mohimo og lakang aron pag-monitor sa maong gang.

Apil sa gimando ni Santander ang pagsubay sa matag police station sa ilang area, ilabina kung dunay mga pawnshop o bangko sa ilang area of responsibility.

Duna na’y gipangkatag nga mga hulagway sa mga notadong miyembro sa maong gang ang CIB ngadto sa tanang police stations aron mas sayon nila nga mailhan kung naa kini sa ilang lugar.

Gibutyag ni Santander nga kasagaran sa mga sakop sa maong grupo gikan sa Luzon area apan dili ika-salikway nga dunay mga lokal nga grupo ang mohimo sa maong kalihukan.

Apil sa kasayuran nga nahipos sa kapolisan mao nga dunay mga sakop sa maong gang mga kanhi trabahante og minahan hinungdan nga abtik ug maayong mo-plano sa pagkawot paingon sa ilang posibling target nga establisamento.

Gipasidan-an ni Santander ang tanang nanag-iya og mga pawnshops o mga nagdumala og mga bangko nga unta magbutang gyud sila og mga alarm systems aron mas dali mahibaw-an kung nasulod na sa mga acetylene gang.

Ang mga nanag-iya og mga paabangan nga panimalay ang gihangyo usab nga unta dili magpataka og dawat sa mga tawo nga gustong moabang sa ilang panimalay.

Sugyot ni Santander nga pangayoan og ID ang moabang aron masubay kung taga asa ug unsa ang tumong sa pagpuyo ug giawhag sa kapolisan nga mo-report dayon kung may kadudahang lihok. (BANAT NEWS)