500 nahatagan og PhilHealth cards sa Toledo

CEBU, Philippines - Niabot sa 500 ka kabus nga pamilya sa dakbayan sa Toledo ang pasiunang nahatagan og PhilHealth cards sa lokal nga kagamhanan.

Gipangulohan ni Toledo City Vice Mayor Antonio Yapha Jr, kauban nilang Konsehal Zosimo Abellanosa, Merly Abad ug Leo Dolino ang pagpanghatag sa PhilHealth cards nga gipahigayun sa Barba Sports Complex. 

Nitambong usab sila si Dr. Tiburcio Dacalos, hepe sa City Health Department ug Dr. Esperanza Canumay.

Matud ni Canumay nga ang maong programa ubos sa National Household Targeting System diin ang mga beneficiaries niini mao ang pamilya nga adunay binuwan nga kita nga ubos sa P4,500. Dugang ni Canumay nga pasiuna lang ang gipanghatag nga 500 ka mga PhilHealth cards sanglit sa ilang gipahigayong pagsubay, ang dakbayan adunay 5,000 ka mga pamilya ang ilang hatagan sa maong health service.

Ang dugang PhilHealth cards ipanghatag unya sa mga benepisyaryo pinaagi sa mga Barangay Nutrition Scholars o sa nurses deployed program sa kabarangayan. Sagad sa mga nakabenepisyo niini mao kadtong mga sakop sa Pantawid Pamilyang Pilipino Program (4Ps).

Matud ni Yapha  importante kaayo ang maong PhilHealth cards panahon nga masakit gumikan sa ka mahal sa bayronon sa pagpa-hospital ug pagpatambal.

Nipasabot ang representante sa PhilHealth Insurance Corporation ngadto sa mga beneficiaries sa mga benepisyo nga ilang makuha gikan sa maong cards. (BANAT NEWS)