Fr. Obach nakigkita na sa iyang gikasab-an

CEBU, Philippines - Si Rev. Fr. Romeo Obach nakapangayo na g’yud og pasaylo ngadto sa 17-anyos nga inahan nga iyang gikasab-an samtang nagpabunyag sa anak ug gigakus kini og dugay sa pari samtang naghilak.

Matud sa dalagita nga nakurat na lang siya kay mikalit lang pagbutho didto sa ilang pinuy-anan sa Mandaue si Fr. Obach uban sa laing duha ka pari sa Sacred Heart chapel sa Barangay Jagobiao, Mandaue.

Ang dalagita pa maoy nag-abli sa pultahan diha nga adunay nanuktok ug misugat sa iyang panan-aw ang bayhon sa pari. Gigakos dayon sa pari ang dalagita dungan sa pagpangayo’g pasaylo.  Matud sa dalagita nga naluoy g’yud kaayo siya sa pari nga naghilak mao iya na lang gialam-alaman ug giingnan nga gipasaylo na niya sa iyang nahimo.

Ang inahan sa menor de-edad nga si Jeivelyn mibutyag nga nalipay siya nga miadto g’yud si Father Obach sa ilang balay. Si Jeivelyn nangayo usab og pasaylo sa pari sa iyang pag-upload sa video sa Facebook.

Hangtod kagahapon ang video sa pagpangasaba sa pari sa dalagita napasa-pasa na sa 50 mil ka Facebook users.  Gihulagway sa dalagita ug sa iyang inahan nga sa gihimo ni Fr. Obach nahuwasan na sila ug nakita g’yud nila ang kasinsero sa pari nga nagbasol sa iyang nahimo. Kini maoy rason nga gi-delete na ni Jeivelyn ang video nga ilang gi-upload sa Facebook dungan sa paghangyo sa mga kritiko sa pari nga mohunong na sa pagsaway kang Father Obach ug pasayloon na ang pari tungod kay tawo lang usab kini nga masayop. (BANAT NEWS)