JVR natagbaw sa performance sa hepe
CEBU, Philippines – Natagbaw si Talisay City Mayor Johnny De los Reyes sa performance sa hepe sa iyang kapolisan sa dakbayan, Supt. Reycel Carmelo Dayon, human sa kontrobersiya kabahin sa llegal nga drugas sa dakbayan.
Hinuon dunay hagit ang mayor kang Dayon nga hugtan ang kampanya batok sa llegal nga drugas nga maoy usa sa mga problema sa siyudad nga nakahatag og hulga sa kahusay ug kalinaw.
Ang kontrobersiya mitumaw dihang ang Provincial Intelligence Branch (PIB) mipahigayon og pagpangronda sa barangay Tanke niadtong milabay’ng semana diin pito ka suspetsadong drug personalities ang nadakpan.
Si Dayon mitataw nga sulod sa tulo ka buwan niyang paglingkod isip hepe sa kapolisan sa Talisay, 15 ka tawo na ang ilang nasikop nga nalambigit sa llegal nga drugas sukwahi sa taho nga wala siya’y accomplishment.
Sama kang De los Reyes, ang hepe sa kapolisan sa probinsiya mihagit kang Dayon sa pagsumpo sa llegal nga drugas sa Talisay.
Dugang niini si Dayon nagkanayon nga bisan og lisud ang kampaniya batok sa llegal nga drugas paningkamutan niyang matuman ang mando sa hepe sa kapolisan sa probinsiya sa pagdakop og daku nga drug personality. Pagkakaron ang kapolisan sa siyudad kanunay na’ng nagpahi-gayon og patrolya sa Tanke. - /GMR (BANAT NEWS)
- Latest
